1. Om tilsynet
Vegtilsynet har gjennomført tilsyn med Statens vegvesen si etterleving av krav til drift og vedlikehald av rekkverk. Tilsynet var gjennomført i Region øst, vegavdeling Hedmark.
Inspeksjonen hadde fokus på følgjande:
- vedlikehald
- montering
- overgangar
- avslutningar
Det vart gjennomført sluttmøte med byggherre 08.04.19 for å undersøkje nærare korleis trafikkfarlege forhold ved rekkverk vert identifisert og handtert. I sluttmøtet vart Vegtilsynet sine registreringar frå inspeksjonen lagt fram.
2. Bakgrunn
Vegtilsynet skal føre risikobasert tilsyn med at Statens vegvesen og Nye Veier AS har tilstrekkelege og effektive styringssystem som sikrar at krav til trafikktryggleik vert følgt. Å vere risikobasert inneber å prioritere tilsynsaktiviteten mot dei områda der risikoen for alvorlege trafikkulykker på vegen er størst. At tilsynet ser på styringssystemet betyr at det rettast mot relevante delar av selskapa sine styringssystem i form av revisjonar og verifikasjonar.
Vegtilsynet utarbeider kvart år eit tilsynsprogram, der vi avgjer kva tema og tilsynssaker vi skal jobbe med i programåret. Rekkverk og sideterreng er viktig for å ivareta tryggleiken til trafikantane, og vil ha stor verknad på skadeomfanget når ulykka først inntreff. Rekkverk og sideterreng er derfor eitt av tre hovudtema for tilsynsprogrammet i 2019.
I 2017 og 2018 gjorde vi fleire funn knytt til rekkverk, der spesielt manglande boltar var eit gjennomgåande problem. Dette går fram av tilsynssak 2018-19 mot Vegdirektoratet.
For å følgje opp sak 2018-19 vil Vegtilsynet gjennomføre enkelte inspeksjonar av rekkverk på riksvegane. I Region øst, som har flest utforkøyringsulykker, vil det verte gjennomført to inspeksjonar.
Inspeksjonen i denne saka vart gjennomført på Rv.2 den 19.03.19 i tidsrommet 09:00- 15:30. Det var fint opphaldsvêr og noko snø på bakken. Grunna mykje trafikk konsentrerte inspeksjonen seg om eit område rundt Brandval (sjå vedlegg 1).
3. Mål
Målet med tilsynet har vore å undersøke om Statens vegvesen, vegavdeling Hedmark, sikrar at eksisterande rekkverk på riksveg ivaretek tryggleiken til trafikantane.
4. Tilsynsresultat
Tilsynskriterium: Rekkverk på Rv. 2 i vegavdeling Hedmark skal vere i samsvar med eksterne krav til:
- vedlikehald
- montering
- overgangar
- avslutningar
Lover og reglar gitt med heimel i lov, som har effekt på tryggleiken knytt til riksvegane, utgjer minimumskrav til tryggleik. Handbok N101 Rekkverk og vegens sideområder har som føremål å ivareta tryggleiken til blant andre trafikantane.1 Vegtilsynet har valt å undersøke etterlevinga av utvalde deler av denne handboka.
Tilsynsbevis 1
Skada rekkverk som vil kunne representere ein trafikkfare skal reparerast snarast mogleg, jf. Handbok N101 kap. 3.2.7. Vegtilsynet gjorde ei registrering der rekkverk ikkje var reparert i tråd med krav:
Tabell 1: Funn etter inspeksjon
| Beskrivelse | Kommentar | Plassering |
| Knekt rekkverksstolpe | 1 knekt stolpe, 80- sone | RV 2 6\7,805 402-Hedmark\Kongsvinger Østre Solørveg |
Tilsynsbevis 2
Rekkverket skal alltid monterast i henhold til leverandørens monteringsbeskriving, jf. Handbok N 101 kap. 3.3.2. Vegtilsynet gjorde 16 registreringar der rekkverk var i strid med kravet:
Tabell 2: Funn etter inspeksjon
| Beskrivelse | Kommentar | Plassering |
| Manglande boltar | Manglar 4 boltar, 80 sone, overgang til bru | RV 2 6\7,845 402-Hedmark\Kongsvinger Østre Solørveg |
| Manglande boltar | Manglar 2 boltar, 6 boltar er laus, overgang til bru | RV 2 6\7,809 402-Hedmark\Kongsvinger Østre Solørveg |
| Manglande boltar | Manglar 4 boltar, 80 sone, overgang til bru | RV 2 6\7,827 402-Hedmark\Kongsvinger Østre Solørveg |
| Manglande boltar | Manglar 4 av 8 boltar, ein heilt laus, roten stolpe | RV 2 6\7,781 402-Hedmark\Kongsvinger Østre Solørveg |
| Lause boltar | Lause boltar | RV 2 6\7,897 402-Hedmark\Kongsvinger Østre Solørveg |
| Manglande boltar | Manglar boltar i rekkverket i over-gang veg bru | RV 2 6\7,819 402-Hedmark\Kongsvinger Østre Solørveg |
| Manglande boltar | Manglar 4 boltar, 80 sone, start på brurekkverk | RV 2 76\32,079 402-Hedmark\Kongsvinger Østre Solørveg |
| Manglande boltar | Manglar 4 boltar, 80 sone, enden av brurekkverk | GV 370 1\7,457 402-Hedmark\Kongsvinger |
| Manglande boltar | Manglar 4 boltar, 80 sone, enden av brurekkverk | GV 370 1\7,457 402-Hedmark\Kongsvinger |
| Manglande boltar | Manglar 4 boltar, 80 sone, rett etter bru | GV 370 1\7,461 402-Hedmark\Kongsvinger |
| Manglande boltar | Manglande bolt i nedføring | RV 2 6\7,970 402-Hedmark\Kongsvinger Østre Solørveg |
| Manglande boltar | Rekkverket er forsterka med ekstra skinne, i denne er det berre 4 bolte-hol | RV 2 8\9,441 423-Hedmark\Grue Solør-vegen |
| Manglande boltar | Manglar 1 bolt, 80 sone | RV 2 6\7,914 402-Hedmark\Kongsvinger Østre Solørveg |
| Manglande boltar | Manglar 4 boltar, 80 sone, enden av bru rekkverk | RV 2 6\7,948 402-Hedmark\Kongsvinger Østre Solørveg |
| Manglande boltar | Manglande boltar, fleire lause boltar på rekkverket på brua | RV 2 6\7,924 402-Hedmark\Kongsvinger Østre Solørveg |
| Feilmontert rekkverk | Rekkverk montert mot køyreretning | RV 2 806\0,236 402-Hedmark\Kongsvinger |
Tilsynsbevis 3
Rekkverket skal alltid starte og avsluttast slik at det ikkje utgjer ein risiko for personskadar, jf. Handbok N 101 kap. 3.3.2. Vegtilsynet gjorde to registreringar der rekkverk var avslutta i strid med kravet:
Tabell 3: Funn etter inspeksjon
| Beskrivelse | Kommentar | Plassering |
| Trafikkfarleg rekkverksende |
Skinna er lagt ned | RV 2 76\32,077 402-Hedmark\Kongsvinger Østre Solør-veg |
| Trafikkfarleg rekkverksende |
80-sone, sjå bilete under | RV 2 6\7,914 402-Hedmark\Kongsvinger Østre Solør-veg |
Vegtilsynet gjer merksam på at endeavslutningane er vurdert mot dagens krav til endeavslutning, ikkje mot andre krav som eventuelt gjaldt på byggetidspunktet.
Desse registreringane vert derfor ikkje kategorisert som brot på dagens krav, men ut frå eit trafikktryggleiksperspektiv vel Vegtilsynet å ta dei med som forbetringspunkt i rapporten.
Avslutningsmøte 8. april 2019
Vegtilsynet presenterte registreringane frå inspeksjonen i avslutningsmøte med byggjeleiar og kontrollingeniør på den aktuelle driftskontrakten 08.04.19. Dei opplyste at dei ikkje var kjend med dei aktuelle registreringane, og at inspeksjonane som vert gjennomført av driftskontrakta heller ikkje ville fange opp denne type registreringar. Dei tok atterhald om at dei berre uttalde seg om registreringane som var på veg. Mange av registreringane var på bru, som ligg under bruavdelinga i vegavdelinga.
Vurdering
Vegtilsynet har kategorisert 17 registreringar som brot på krav i Handbok N101 på eit avgrensa område av Rv. 2 i vegavdeling Hedmark, og to registreringar som forbetringspunkt. Registreringane var ikkje fanga opp av Statens vegvesen, og 16 av registreringane var manglande boltar, som vegavdelinga opplyser at dei ikkje har inspeksjonsrutinar for.
Manglande inspeksjonsrutinar for boltar er allereie påvist som ein systematisk svikt i Statens vegvesen, i pågåande tilsynssak 2018-19. Vegtilsynet hadde møte med Vegdirektoratet 11.04.19, og dei jobbar med tiltak både for å inspisere og utbetre rekkverka på riks- og fylkesvegnettet på kort sikt, samt systemtiltak for å sikre at avvika ikkje gjentek seg.
Vegtilsynet set derfor ikkje eit nytt avvik på Statens vegvesen, men rår vegavdeling Hedmark til å gjere ei sjølvstendig vurdering av kor kritisk registreringane er for trafikktryggleiken, og minimum følgjer opp tiltaka som kjem frå Vegdirektoratet.
5. Konklusjon
Vegtilsynet har registrert 17 brot på handbok N101, og to forbetringspunkt.
Manglande inspeksjonsrutinar for boltar er allereie påvist som ein systematisk svikt i Statens vegvesen i pågåande tilsynssak 2018-19. Vegtilsynet set derfor ikkje eit nytt avvik i denne saka.
Vedlegg 1: Oversikt over funn
Figuren under viser alle 19 funn ved Brandval langs Rv2
