Samandrag
For å sikre tryggleiken i veginfrastrukturen er det i Håndbok R411 Bruforvaltning riksveg (2018) mellom anna fastsett krav til inspeksjon av bruer på riks- og europaveg, og krav til kompetanse og erfaring for personell som gjennomfører hovudinspeksjonar.
Nye Veier AS si bruportefølje er aukande i takt med at selskapet sidan oppstarten i 2016 har dobla veglengda si. Per november 2025 har selskapet ansvar for 163 bruer. I tillegg har selskapet 145 bruer under planlegging eller bygging. Bruportefølja består i hovudsak av nyare bruer med høg trafikkmengde. Frå 2027 og 2028 vert bruportefølja ytterlegare utvida og endra ved at Nye Veier AS mellom anna overtek ansvar for om lag 170 eldre bruer på riksveg 13 og europaveg 136.
Målet med tilsynssaka har vore å undersøke om Nye Veier AS planlegg og gjennomfører hovud- og enkeltinspeksjon av bru i samsvar med krav, og om selskapet påser at hovudinspeksjon blir utført av personell med kompetanse og erfaring i samsvar med krav.
Samla sett viste tilsynssaka at Nye Veier AS i all hovudsak planlegg og gjennomfører hovud- og enkelinspeksjonar i samsvar med krav, og at Nye Veier AS påser at kravet til kompetanse og erfaring hjå personell som utfører hovudinspeksjonar er ivareteke.
Inspeksjonsplanar for hovudinspeksjonar vart utarbeidd i samsvar med krav for 94 % av bruene, og det vart gjennomført hovudinspeksjon av 89 % av bruene. Det er viktig at hovudinspeksjonar vert gjennomført ettersom dette er ein nær visuell kontroll av heile brua for å kontrollere at alle element oppfyller sin funksjon. Hovudinspeksjon skal utførast for å registrere tilstanden til alle element på brua.
Vegtilsynet si vurdering er Nye Veier AS har god oversikt over og grunngjeving for kvifor det enten mangla inspeksjonsplan eller var planlagt hovudinspeksjon med lengre intervall enn kravet i Håndbok R411. Dette er i hovudsak knytt til at bruene har vore del av større utbyggingsprosjekt eller skal rivast.
Inspeksjonsplanar for enkelinspeksjonar vart utarbeidd i samsvar med krav for 98 % av bruene, og det vart gjennomført enkelinspeksjon av 97 % av bruene. Det er viktig at enkelinspeksjonar vert gjennomført ettersom inspeksjonen har som formål å avdekke om det er synlege skadar som på kort sikt påverkar eller kan påverke bruene si bæreevne, trafikktryggleik, vedlikehald eller miljø/estetikk.
Gjennomføringa av saka har vist at Nye Veier AS bør intensivere arbeidet med å samle all informasjon knytt til planlegging og gjennomføring av bruinspeksjonar i eit datasystem. Ettersom det er rådgivarfirma og entreprenørar som utfører arbeidet for selskapet, framstår det som viktig at Nye Veier AS sitt datasystem også gjev selskapet naudsynt oversikt for oppfølging og kontroll med desse.
Tilsynssaka har vist at Nye Veier AS påser at kravet til kompetanse og erfaring hjå personell som utfører hovudinspeksjonar er ivareteke ved at kravet inngår i kontrakt med rådgivarfirma eller entreprenør som utfører inspeksjonane. Nye Veier AS gjennomfører i tillegg årleg møte med entreprenørar før oppstart av inspeksjonssesongen, der formålet mellom anna er å sikre at personell som utfører hovudinspeksjonane har kompetanse og erfaring i samsvar med krav. Nye Veier AS deltek også som observatør ved gjennomføring av hovudinspeksjonar med formål om kvalitetssikring.
